Chegou o último día deste trimestre!
Hoxe escribimos a carta aos Reis Magos, pero non pedimos únicamente para nòs… Non non! Tamén para o mundo, para a nosa familia, para as persoas que precisan axuda…
Porque se algo aprendimos durante estas semanas de decembro é que… TER O QUE PRECISAS É TELO TODO!
BO NADAL A TODOS E TODAS!
O trimestre está a piques de rematar, pero os nosos actores e actrices continúan traballando e aprendendo día a día.
Hoxe… fora da escola! Pasamos a mañá en Naturnova onde desfrutamos dunha exposición adicada aos seres vivos e o universo. Xustamente os temas que traballamos este trimestre nas Ciencias!
De modo que foi unha oportunidade para facer memoria e descubrir máis cousas aínda!
Rematamos a mañá merendando na Porta do Sol, dando un paseo pola rúa do Príncipe e a Alameda así quentamos o corpo que boa falta facía!
Cunha visita moi especial!
Hoxe chegamos a aula e tiñamos as fiestras decoradas, quen sería? Os nenos e nenas de 3ºB apostaron polo elfo do Nadal.
Pronto saímos de dúbidas porque, un rato despois, apareceu un sobre enriba dunha cadeira.
Abrímolo e… SORPRESA! Tiña dentro unha carta asinada coas pegadas dun elfo!
Nela contounos que estivera onte pola noite na nosa aula decorando un pouco, pero que nos deixou algunha fiestra para que sexamos nós os responsables de decórala. Ademais dun calendario de adviento con actividades divertidas para facer en clase e en casa!
Para o DÍA 1 pediunos escribir 4 cousas que tivéramos ganas de facer ou que nunca fixeramos.
Para o DÍA 2 na casa, temos que buscar información sobre a flor de pascua e facer un debuxo dela.
Para o DÍA 3 na casa, debuxar unha estrela fugaz e escribir dentro unha palabra en galego relacionada co Nadal.
Estades preparados e preparadas? Pois comezamos!
Os nosos actores e actrices xa saben que este curso é cousa do noso ciclo a decoración do hall! Cada curso un ciclo é o responsable desta tarefa, por tanto, 3º e 4º temos que poñermos mans à obra!
De modo que, o venres, cada neno e nena, levará un CD/DVD que terá que decorar con motivos navideños e entregar á volta da ponte.
Sería un bo momento para poder desfrutar da familia e facer unha manualidades xuntos, non si?
Podedes utilizar todo tipo de material utilizando como base o CD/DVD 📀: goma eva, cartolina, algodón, botóns….
Déixovos unhas imaxes por se vos serven de axuda e de inspiración:
Esta semana estivemos na aula de informática 👩💻!
Aproveitamos a ocasión para coñecer as partes do ordenador: torre, teclado, rato… Como acendelo, como apagalo… Unha serie de conceptos básicos para poder facer un bo uso dos mesmos.
Nesta primeira toma de contacto, entramos na páxina da escola e, dentro dela, no noso blog. Aprendemos a utilizar a 🔍 e o importante que é escribir todo correctamente para que aparezan as cousas que buscamos.
Finalmente, navegamos por todo o material relacionado con CCSS do noso blog para facer un repaso para o exame.
Porque aprender e estudar debe ser divertido, non si?
Velaquí algunha imaxe:
